సాధారణంగా ఐస్క్రీమ్ ధర ఎంత ఉంటుంది అంటే మహా అయితే వందల్లో ఉంటుందని చెబుతారు. ఐస్క్రీమ్ మనకు వివిధ రకాల ఫ్లేవర్ లలో, వివిధ రకాల రుచులను కలిగి ఉంటుంది కనుక కొంతవరకు ధర పెట్టవచ్చు. అయితే ఒక ఐస్ క్రీమ్ ధర 60 వేల రూపాయలు ఉంటుందంటే మీరు నమ్ముతారా? వినడానికి ఎంతో ఆశ్చర్యంగా అనిపించినా ఇది నిజం.. మరి అంత ధర కలిగిన ఐస్ క్రీమ్ ఏమిటి ?దాని ప్రత్యేకత ఏమిటో ఇక్కడ తెలుసుకుందాం.
ఇంత ఖరీదు చేసే ఈ ఐస్ క్రీమ్ పేరు “బ్లాక్ డైమండ్” అయితే ఇది సాధారణ ఐస్ క్రీమ్ మాదిరిగా ఉంటుందనుకుంటే పొరపాటే. ఈ ఐస్ క్రీమ్ పై 23 క్యారట్ల బంగారు రేకులను చల్లడం వల్ల ఐస్ క్రీమ్ అంత ధర పలుకుతోంది. బంగారు రేకులను మనం తినవచ్చా..? అనే సందేహం మీకు కలగొచ్చు.. ఆ బంగారు రేకులను ఏమాత్రం సందేహం పడకుండా తినవచ్చు. ఇంత ప్రత్యేకమైన ఈ ఐస్ క్రీమ్ తినాలంటే తప్పకుండా మీరు దుబాయ్ వెళ్లాల్సిందే.
దుబాయ్ లోని ‘స్కూపీ కేఫ్’లో మాత్రమే ఈ ప్రత్యేకమైన ఐస్ క్రీమ్ ను తయారు చేస్తారు. తాజాగా నటి షెనాజ్ ట్రెజరీ దుబాయ్ పర్యటనలో భాగంగా ఈ కేఫ్ ను సందర్శించి “బ్లాక్ డైమండ్” ఐస్ క్రీమ్ రుచిని చూశారు. ఈ సందర్భంగా ఆమె ఇన్స్టాగ్రామ్ పేజీలో ఈ వీడియోను పోస్ట్ చేస్తూ రూ.60 వేల రూపాయల ఖరీదు చేసే ఐస్ క్రీమ్ రుచి చూశానని తెలిపారు.
