భూమి వైపుకు అత్యంత వేగంగా సౌర తుఫాను దూసుకు వస్తుందని అమెరికా అంతరిక్ష సంస్థ నాసా వెల్లడించింది. ఆ సౌర తుఫాను గంటకు 1.6 మిలియన్ కిలోమీటర్ల వేగంతో భూమి వైపుకు వస్తుందని, అయితే సమయం గడిచే కొద్దీ దాని వేగం మరింత పెరిగే అవకాశం ఉందని తెలిపింది.
సూర్యుని నుంచి అత్యంత శక్తివంతమైన కణాలు లేదా ప్లాస్మా బయటకు వచ్చి సౌర తుఫాన్లుగా మారుతాయి. సౌర గాలుల రూపంలో బయటకు వస్తాయి. కాగా ఆ సౌర తుఫాను భూమిని నేడు (జూలై 11) లేదా రేపు (జూలై 12) ఢీకొట్టే అవకాశం ఉందని సైంటిస్టులు తెలిపారు. భూమిని ఉత్తర లేదా దక్షిణ అక్షాంశాల వద్ద ఈ సౌర తుఫాను ఢీకొట్టే అవకాశం ఉందని తెలిపారు.
ఇక ఈ సౌర తుఫాను భూమిని ఢీకొనే సమయంలో భూమి చుట్టూ పరిభ్రమిస్తున్న శాటిలైట్లపై ప్రభావం పడుతుందని సైంటిస్టులు తెలిపారు. దీని వల్ల జీపీఎస్ నావిగేషన్, మొబైల్ ఫోన్ సిగ్నల్స్, శాటిలైట్ టీవీ సిగ్నల్స్ సరిగ్గా పనిచేయవని తెలిపారు.
