రుచికరమైన పొటాటో లాలీపాప్స్.. ఇలా చేస్తే తినకుండా అసలు ఉండరు!

సాధారణంగా మాంసాహారులైతే చికెన్ లాలిపాప్ తింటూ ఎంజాయ్ చేస్తుంటారు. కానీ శాఖాహారులు కూడా ఆ విధమైనటువంటి అనుభవాన్ని పొందాలనుకునే వారికి పొటాటో లాలీపాప్స్ ఒక మంచి స్నాక్స్ ఐటమ్ అని చెప్పవచ్చు.మరి పొటాటో లాలీపాప్స్ ఏ విధంగా తయారు చేయాలో ఇక్కడ తెలుసుకుందాం.

కావలసిన పదార్థాలు

*బంగాళాదుంపలు 2

*పచ్చిమిర్చి ముక్కలు టీ స్పూన్

*కొత్తిమీర తురుము రెండు టేబుల్ స్పూన్లు

*పసుపు చిటికెడు

*కారం పొడి టీ స్పూన్

*జీలకర్ర చిటికెడు

*నిమ్మరసం టేబుల్ స్పూన్

*ధనియాల పొడి అర టీ స్పూన్

*ఉప్పు రుచికి సరిపడినంత

*అల్లం వెల్లుల్లి పేస్ట్ టీ స్పూన్

*చాట్ మసాలా టీ స్పూన్

*మైదా పిండి ఒక టేబుల్ స్పూన్

*బ్రెడ్ పౌడర్ ఒకటిన్నర కప్పు

*నీళ్లు సరిపడినంత

*నూనె డీప్ ఫ్రైకి సరిపడినంత

తయారీ విధానం

ముందుగా బంగాళదుంపలను మెత్తగా ఉడకబెట్టి వాటి తోలు తీసి బాగా చిదిమి పెట్టుకోవాలి. ఈ బంగాళా దుంప మిశ్రమాన్ని ఒక గిన్నెలోకి తీసుకొని అందులోకి కొద్దిగా బ్రెడ్ పొడి, పచ్చిమిర్చి తరుగు, పసుపు, కారం, జీలకర్ర, ధనియాల పొడి, అల్లం వెల్లుల్లి పేస్టు, నిమ్మరసం, చాట్ మసాలా వేసి చపాతీ పిండిలా తయారు చేసుకోవాలి. మన చేతికి నూనె రాసుకుని ఈ మిశ్రమాన్ని చిన్న చిన్న ఉండలుగా తయారు చేయాలి. ఒక పాత్రలో మైదా పిండికి కొద్దిగా నీళ్లు జతచేసి దోసె పిండిలా కలుపుకుని పక్కన పెట్టుకోవాలి. ముందుగా తయారు చేసుకున్న బంగాళదుంప ఉండలను మైదా పిండిలో ముంచి వెంటనే బ్రెడ్ పొడిలో అటు ఇటు దొర్లించాలి.ఈ దొర్లిన ఉండలను బాగా మరుగుతున్న నూనెలో వేసి బంగారు రంగులోకి వచ్చేవరకు వేయించాలి. ఈ ఉండలను లాలీపాప్ స్టిక్స్ గుచ్చి టమాటో కెచప్ తో తింటే ఎంతో రుచికరంగా ఉంటాయి.