సాయంత్రం పూట ఏవైనా స్నాక్స్ తినాలనిపిస్తే అటువంటి వారికి బ్రెడ్ బోండా మంచి ఆప్షన్ అని చెప్పవచ్చు. ఎంతో రుచికరంగా అతి తక్కువ సమయంలోనే బ్రెడ్ బోండాలు తయారు చేసుకుని సాయంత్ర సమయాన్ని ఎంతో అద్భుతంగా ఆస్వాదించవచ్చు. మరి బ్రెడ్ బోండాలను ఏ విధంగా తయారు చేసుకోవాలో ఇక్కడ తెలుసుకుందాం.
కావలసిన పదార్థాలు
*బ్రెడ్ పౌడర్ ఒకటిన్నర కప్పు
*ఉడికించిన బంగాళదుంప ఒక కప్పు
*జీలకర్ర పొడి పావు టీ స్పూన్
*కొద్దిగా కరివేపాకు
*ఉల్లిపాయ ముక్కలు రెండు టేబుల్ స్పూన్లు
*ఉప్పు తగినంత
*పులిసిన గట్టి పెరుగు పావు కప్పు
*కారం పొడి అర టీ స్పూన్
*నూనె డీప్ ఫ్రైకి సరిపడేంత
తయారీ విధానం
ముందుగా ఉడికించిన బంగాళదుంపను మెత్తగా చిదిమి పెట్టుకోవాలి. అందులోకి జీలకర్ర పొడి, కరివేపాకు ముక్కలు, ఉల్లిపాయ ముక్కలు, ఉప్పు, కొద్దిగా కారం పొడి వేసి బాగా కలుపుకోవాలి. ఈ మిశ్రమంలో కి బ్రెడ్ పౌడర్ వేసుకొని కొద్దికొద్దిగా పెరుగుని వేస్తూ బోండా పిండిలా కలుపుకోవాలి.ఈ విధంగా పిండిని తయారు చేసుకున్న తర్వాత ఒక కడాయిలో డీప్ ఫ్రైకి సరిపడా నూనె వేసి వేడి చేయాలి. నూనె కాగిన తరువాత బోండాల సైజులో మిశ్రమాన్ని వేసుకుని బంగారు వర్ణంలోకి వచ్చిన తర్వాత తీసేయాలి. వేడి వేడిగా ఉన్న ఈ బ్రెడ్ బోండాలను పల్లి చట్నీ లేదా టమోటో సాస్ తో సర్వ చేసుకుంటే ఎంతో క్రిస్పీగా రుచికరమైన బ్రెడ్ బోండాలను ఆస్వాదించవచ్చు.
