Prabhas On Salaar Success : డార్లింగ్స్ అంటూ తొలిసారి స‌లార్ సక్సెస్‌పై క్రేజీ రియాక్ష‌న్ ఇచ్చిన ప్ర‌భాస్

Prabhas On Salaar Success : బాహుబలి 1,2 చిత్రాల‌తో ఎంతో పెద్ద విజయాల‌ని త‌న ఖాతాలో వేసుకున్న ప్ర‌భాస్ ఆ త‌ర్వాత సాహో, రాధే శ్యామ్, ఆదిపురుష్ చిత్రాల‌తో డిజాస్ట‌ర్స్ చ‌విచూశాడు. వ‌రుస ఫ్లాపుల త‌ర్వాత స‌లార్ రూపంలో ప్ర‌భాస్‌కి అతి పెద్ద స‌క్సెస్ వ‌చ్చింది. మొత్తానికి రెబల్ స్టార్ ప్రభాస్ 2023ని ఘనంగా ముగించాడు అనే చెప్పాలి. బాహుబలి తర్వాత ఊరిస్తూ వస్తున్న విజయం సలార్ తో దక్క‌డంతో అభిమానులు మాత్రం ఫుల్ ఖుష్ అవుతున్నారు. పాన్ ఇండియా హీరోగా ప్రభాస్ పై ఎలాంటి అంచనాలు ఉన్నాయో ఆ అంచానాలు అన్నీ కూడా సలార్ తో నిలబడ్డాయి.

ప్రశాంత్ నీల్ దర్శకత్వంలో వచ్చిన సలార్ సినిమా ప్రభాస్ నుంచి ఫ్యాన్స్ ఎలాంటి సినిమా కావాలని అనుకుంటున్నారో అలాంటి వినోదం పంచింది. డార్లింగ్ కటౌట్ కు కరెక్ట్ సినిమా ఇది అంటున్నారు ఫ్యాన్స్. రెండు భాగాలుగా తెరకెక్కుతోన్న సలార్ సినిమా తర్వాత నాగ్ అశ్విన్ డైరెక్షన్లో సినిమా చేస్తున్నాడు ప్రభాస్. కల్కి 2898ఎడి అనే టైటిల్ తో తెరకెక్కుతోన్న ఈ సినిమా పై కూడా భారీ అంచనాలు క్రియేట్ అయ్యాయి. సైన్స్ ఫిక్ష‌న్ మూవీగా ఈ చిత్రాన్ని అత్యంత ప్ర‌తిష్టాత్మ‌కంగా రూపొందిస్తున్నాడు అశ్విన్. మ‌రోవైపు మారుతి ద‌ర్శ‌క‌త్వంలో కూడా ప్ర‌భాస్ ఓ చిత్రం చేస్తుండ‌గా, ఈ రెండు చిత్రాలు కూడా 2024లో ప్రేక్ష‌కుల ముందుకు వ‌చ్చి సంద‌డి చేయ‌బోతున్న‌ట్టు తెలుస్తుంది.

అయితే స‌లార్ స‌క్సెస్ త‌ర్వాత మూవీ టీం అంద‌రు కూడా త‌మ అభిప్రాయాల‌ని పంచుకున్నారు. ప్ర‌భాస్ మాత్రం స్పందించింది లేదు. ఎట్ట‌కేల‌కు న్యూ ఇయ‌ర్ సంద‌ర్భంగా త‌న ఇన్‌స్టాగ్రామ్‌లో స‌లార్ మూవీలోని పోస్ట‌ర్ షేర్ చేస్తూ.. నేను ఖాన్సార్ భవిష్య‌త్తేంటో తేల్చే లోపు మీరు హాయిగా న్యూ ఇయ‌ర్ ఎంజాయ్ చేయండి డార్లింగ్స్‌.. స‌లార్ సీజ్‌ఫైర్‌ను మీ సినిమాగా భావించి పెద్ద స‌క్సెస్ అందించినందుకు థ్యాంక్యూ అని కామెంట్ పెట్టాడు. ప్ర‌భాస్ పోస్ట్ ఇప్పుడు నెట్టింట తెగ హ‌ల్‌చ‌ల్ చేస్తుంది. ఇక స‌లార్ చిత్రం తొలి రోజే ప్ర‌పంచవ్యాప్తంగా రూ.178.7 కోట్లు వ‌సూలు చేసి సంచ‌ల‌నం సృష్టించగా, ఈ మూవీ షారూఖ్ డంకీ మూవీని కూడా త‌ట్టుకొని 10 రోజుల్లో రూ.500 కోట్ల మార్క్ అందుకుంది.