రూ.30 కోట్లు పెట్టి నిర్మిస్తే.. సీతారామంకు ఇప్ప‌టి వ‌ర‌కు ఎంత వ‌చ్చిందో తెలుసా..?

ఆగస్టులో విడుదలైన చిత్రాల్లో సీతా రామం బెస్ట్ మూవీ గా చెప్పవచ్చు. ఈ చిత్రానికి గాను హను రాఘవపూడి దర్శకత్వం వహించారు. దుల్కర్ సల్మాన్, మృణాల్ ఠాకూర్ హీరో హీరోయిన్స్ గా నటించారు. మృణాల్ ఠాకూర్  సీతారామం చిత్రం ద్వారా తెలుగు తెరకు పరిచయం అయ్యారు. రష్మిక మందన్న ఈ చిత్రంలో కీలక పాత్ర పోషించింది. సుమంత్, మురళీ శర్మ, వెన్నెల కిషోర్, ప్రకాష్ రాజ్, భూమిక, గౌతమ్ మీనన్ వంటి వారు ఈ చిత్రంలో ముఖ్య పాత్రలు పోషించారు.

విశాల్ చంద్రశేఖర్ సీతారామం చిత్రానికి అద్భుతమైన సంగీతాన్ని అందించారు. ఈ చిత్రం మంచి క్లాసిక్ లవ్ స్టోరీ అని చెప్పవచ్చు. దర్శకుడు ఈ చిత్రం ద్వారా ప్రేక్షకులకు ఒక మంచి లవ్ స్టోరీని అందించాడు. ప్రస్తుతం ఈ చిత్రం బింబిసార చిత్రంతో పోటీ పడుతూ బాక్సాఫీస్ వద్ద దూసుకుపోతోంది. సీత కోసం రామ్ రాసిన ఉత్తరాన్ని  ఆఫ్రీన్ (రష్మిక) అందజేయడం కోసం బయలుదేరుతుంది. ఎన్నో ట్విస్టులతో క్లాసిక్‌ లవ్ స్టోరీగా ముందుకు సాగుతోంది ఈ చిత్ర కథాంశం.

ప్రేక్షకులలో మంచి హిట్ టాక్ ని అందుకుని బాక్సాఫీస్ వద్ద మంచి కలెక్షన్లు రాబట్టుకుంటూ ముందుకు దూసుకుపోతోంది సీతారామం. గీతాంజలి,  తొలిప్రేమ, ఇప్పుడు సీతారామం.. అంటూ మంచి ప్రేమ కథాంశం అంటూ ఈ చిత్రంపై సోషల్ మీడియాలో ప్రశంసల వర్షం కురుస్తోంది.

ఈ చిత్రం విడుదలైన మొదటి రోజు నుంచే కలెక్షన్స్ వర్షం కురిపిస్తోంది. ప్రపంచవ్యాప్తంగా విడుదలైన ఐదు రోజుల్లోనే ఈ చిత్రం రూ.30 కోట్ల కలెక్షన్లను రాబట్టింది. ప్రేక్షకుల నుంచి సీతారామం చిత్రానికి  వచ్చిన ఆదరణను చూస్తుంటే రూ.100 కోట్ల‌ వసూలు దాటినా ఆశ్చర్యపోనక్కర్లేదని సినీ విశ్లేషకులు వెల్లడిస్తున్నారు. కాగా సీతారామం మూవీకి గాను రూ.30 కోట్లు పెట్టి నిర్మించారు. ఈ మూవీ ప్రీ రిలీజ్ బిజినెస్ రూ.17 కోట్ల వ‌ర‌కు జ‌రిగింది. మొత్తంగా చూస్తే ఇప్ప‌టికే బ్రేక్ ఈవెన్ సాధించిన ఈ మూవీకి ఇప్ప‌టి వ‌ర‌కు అన్ని హ‌క్కులు క‌లిపి రూ.60 కోట్లు వ‌చ్చాయ‌ని చెబుతున్నారు. అంటే పెట్టిన దానికి రెట్టింపు మొత్తం వ‌చ్చింద‌ని అర్థం. ఇక ఇలాగే గ‌న‌క ఈ మూవీ కొన‌సాగితే రూ.100 కోట్ల క్ల‌బ్‌లో చేరుతుంద‌ని అంటున్నారు.