Brahmanandam : తెలుగు సినిమా ఇండస్ట్రీలో కమెడియన్ బ్రహ్మానందం గురించి ప్రత్యేకంగా చెప్పాల్సిన పనిలేదు. ఈయన ఎన్నో సినిమాలలో తన అద్భుతమైన కామెడీ ద్వారా ప్రేక్షకులను ఎంతగానో ఆకట్టుకున్నారు. కొన్ని సినిమాలు బ్రహ్మానందం కామెడీకే సూపర్ హిట్ అయ్యాయి అంటే ఆయన ఏ స్థాయిలో ప్రేక్షకులను ఆకట్టుకున్నారో అర్థమవుతుంది. అయితే ఈ మధ్యకాలంలో కొన్ని అనారోగ్య పరిస్థితుల కారణంగా బ్రహ్మానందం ఎక్కువగా సినిమాలలో నటించడం లేదు.
తాజాగా హరీష్ వడత్యా దర్శకత్వంలో శ్రీకాంత్, సంగీత ప్రధాన పాత్రలలో తెరకెక్కిన చిత్రం తెలంగాణ దేవుడు. తెలంగాణ ముఖ్యమంత్రి కేసీఆర్ బయోపిక్ ఆధారంగా ఈ సినిమా తెరకెక్కింది. ఈ క్రమంలోనే ఇందులో బ్రహ్మానందం ఒక కీలకమైన పాత్రలో నటించారు. ఈ సినిమా విడుదలైన సందర్భంగా బ్రహ్మానందం సోషల్ మీడియా వేదికగా ఒక వీడియోని షేర్ చేశారు.
ఈ వీడియోలో బ్రహ్మానందం సినిమా గురించి మాట్లాడుతూ.. తనని ఒక కమెడియన్ గా కూడా చూడకుండా ఎంతో కీలకపాత్రలో నటించే అవకాశాన్ని కల్పించారు అంటూ వెల్లడించారు. అయితే ఈ వీడియోలో బ్రహ్మానందాన్ని చూస్తే మాత్రం అందరూ షాక్ అవ్వాల్సిందే. ఈయన అనారోగ్యం కారణంగా చాలా ఇబ్బంది పడినట్లు తెలుస్తోంది. ఈ క్రమంలోనే శరీరం మొత్తం వదులుగా మారిపోయి ఉండడంతో చాలామంది బ్రహ్మానందం ఏంటి ఇలా మారిపోయారు.. అంటూ కామెంట్ చేస్తున్నారు.
