పోలీసులు ఉన్నార‌ని ధైర్యంతో ఉంటే వారే చోరీకి పాల్ప‌డ్డారు.. వీడియో వైర‌ల్‌..

సమాజంలో జరుగుతున్న దోపిడీలు, అరాచకాల నుంచి ప్రజలను కాపాడాల్సిన పోలీసులే వారి బాధ్యతలు మరిచి దొంగతనాలకు పాల్పడుతున్న ఘటన ప్రజలను ఎంతో ఆశ్చర్యానికి గురి చేస్తోంది. పోలీసులు చేస్తున్నటువంటి ఇలాంటి పాడు పనులకు ప్రజలలో పోలీసులపై ఉన్న విశ్వాసం తగ్గిపోతోంది. సమాజం పట్ల బాధ్యత వహించాల్సిన పోలీసులు వాళ్ల బాధ్యత మరిచి దొంగతనానికి పాల్పడిన ఘటన చిత్తూరు జిల్లాలో చోటుచేసుకుంది. ప్రస్తుతం ఈ ఘటనకు సంబంధించిన వీడియో సోషల్ మీడియాలో వైరల్ గా మారింది. పూర్తి వివరాల్లోకి వెళితే..

ఆంధ్రప్రదేశ్ రాష్ట్రం చిత్తూరు జిల్లాలోని విజయ డైరీ సమీపంలో తమిళనాడుకు చెందిన వ్యక్తి పీవీకేఎన్ కళాశాల నుంచి కలెక్టరేట్‌కు వెళ్లే మార్గంలో వ్యానులో దుస్తుల వ్యాపారం చేస్తూ ఉంటాడు. ఈ క్రమంలోనే ఓ రోజు రాత్రి బట్టలను మూట కట్టి పోలీసులు ఉన్నారన్న ధైర్యంతో అక్కడి నుంచి వ్యాపారి ఇంటికి వెళ్లాడు. మరుసటి రోజు ఉదయం వచ్చి ఆ మూటలను గమనించిన వ్యాపారి మూటలో బట్టలు తక్కువగా ఉండటాన్ని గమనించాడు. ఈ క్రమంలోనే తన షాపులో దొంగతనం జరిగిందని భావించిన వ్యక్తి అక్కడే ఉన్న సీసీ టీవీ ఫుటేజ్ చూశాడు.

ఈ వీడియో చూసిన షాపు యజమాని ఒక్కసారిగా ఆశ్చర్యానికి గురయ్యాడు. తన షాపులో దొంగతనం చేసినది సాదాసీదా వ్యక్తులు కాదు పోలీసులేనన్న విషయం తెలియడంతో ఎంతో ఆశ్చర్యానికి గురయ్యాడు. ఇద్దరు వ్యక్తులు ద్విచక్రవాహనంపై రాగా ఒక వ్యక్తి పోలీస్ డ్రెస్ లో ఉండి మరొక వ్యక్తి సివిల్ డ్రెస్ ధరించి ఈ చోరీకి పాల్పడినట్లు గుర్తించాడు. తన షాప్ లో దొంగతనం చేసింది పోలీసులేనని గుర్తించిన యజమాని ఈ విషయాన్ని జిల్లా పోలీస్ శాఖ అధికారులకు తెలియజేయడంతో ఈ విషయం కాస్తా సోషల్ మీడియాలో వైరల్ గా మారింది. విషయం తెలిసిన ప్రజలు పోలీసులు ఈ విధమైనటువంటి చర్యలకు పాల్పడితే సామాన్యుల పరిస్థితి ఏంటి అని ఆందోళన వ్యక్తం చేస్తున్నారు. ప్రస్తుతం ఈ వీడియో సోషల్ మీడియాలో వైరల్ గా మారింది.