పరువు హత్య.. వ్యక్తిని ప్రేమిస్తుందంటూ చెల్లిని తుపాకీతో కాల్చి చంపిన అన్న..

ప్రస్తుత తరుణంలో రోజు రోజుకూ ప్రభుత్వాలు ఎన్నో చట్టాలు చేస్తున్నప్పటికీ కొన్ని విషయాలలో మాత్రం మనుషులు మూర్ఖంగా ప్రవర్తిస్తున్నారు. ముఖ్యంగా పరువు కోసం ప్రజలు ఎంతో తాపత్రయ పడుతున్నారు. ఇంటి పరువు పోతుంది అంటే సొంత వాళ్లను కూడా చంపడానికి వెనకాడటం లేదు. ఎంతో పెద్ద పెద్ద చదువులు చదువుకున్న వాళ్లు సైతం పరువు కోసం హత్య చేసే స్థాయికి దిగజారుతున్నారు. తాజాగా ఇలాంటి పరువు హత్య ఒకటి ఉత్తరప్రదేశ్‌లో చోటు చేసుకుంది. పూర్తి వివరాల లోకి వెళ్తే..

ఉత్తరప్రదేశ్‌లోని మీరట్‌ సర్ధనా ప్రాంతంలో మృతురాలి తల్లి షహనో తన భర్త నుంచి విడాకులు తీసుకొని వేరొక వ్యక్తిని పెళ్లి చేసుకుంది. ఈ క్రమంలోనే తన మొదటి భర్త సంతానమైన ఆరీఫ్, సమ్రీన్‌ తన తండ్రి సంరక్షణలోనే పెరుగుతున్నారు. కాగా సమ్రీన్‌ స్థానికంగా ఉన్న ఒక వ్యక్తితో ఎంతో చనువుగా మెలుగుతూ ఉండేది. ఇది చూసిన కుటుంబ సభ్యులు ఆమె ప్రవర్తన మార్చుకోవాలంటూ ఆమెను గట్టిగా హెచ్చరించారు.

తమ కుటుంబ సభ్యులు హెచ్చరించినప్పటికీ వారి మాట పెడచెవిన పెట్టి అతనితో ఎంతో సన్నిహితంగా మెలుగుతున్న సమ్రీన్‌ పై ఆమె అన్న ఆరీఫ్ ఆగ్రహం వ్యక్తం చేస్తూ నిద్రపోతున్న ఆమెపై నాటు తుపాకీతో కాల్పులు జరిపి అనంతరం అక్కడి నుంచి పోలీస్ స్టేషన్ కి వెళ్లి స్వయంగా లొంగిపోయాడు. ఈ క్రమంలోనే అతనిపై కేసు నమోదు చేసుకున్న పోలీసులు అతనిని కస్టడీలోకి తీసుకుని మృతదేహాన్ని పోస్టుమార్టం నిమిత్తం తరలించారు.