ముంబై ఇండియన్స్ ప్రీ-సీజన్ ఈవెంట్‌లో రోహిత్ డ్యాన్స్.. హార్దిక్ జోడీ సందడి! వీడియో వైరల్..

ఐపీఎల్ 2026 ప్రారంభ మ్యాచ్‌కు ముందు ఐదు సార్లు ఛాంపియన్‌గా నిలిచిన ముంబై ఇండియన్స్ జట్టు ముంబైలో ప్రీ-సీజన్ ఈవెంట్‌ను ఘనంగా నిర్వహించింది. హార్దిక్ పాండ్యా సారథ్యంలో ఉన్న జట్టు మార్చిలో కోల్‌కతా నైట్ రైడర్స్‌తో ఐకానిక్ వాంఖడే స్టేడియంలో తమ పోరును ప్రారంభించనుంది. తాజాగా జియో వరల్డ్ గార్డెన్‌లో నిర్వహించిన ఈ కార్యక్రమంలో దేశవ్యాప్తంగా పలువురు కళాకారులు ప్రదర్శనలు ఇచ్చారు. అయితే ఈ వేడుకలో ప్రధాన ఆకర్షణగా ముంబై ఇండియన్స్ స్టార్ ఆటగాళ్లు రోహిత్ శర్మ, హార్దిక్ పాండ్యా, తిలక్ వర్మ తదితరులు నిలిచారు. సోషల్ మీడియాలో వైరల్‌గా మారిన ఓ వీడియోలో రోహిత్ శర్మ తన కుమార్తె సమైరాతో కలిసి డ్యాన్స్ చేస్తూ కనిపించారు. అదే వీడియోలో హార్దిక్ పాండ్యా తన ప్రేయసి మహికా శర్మతో వేడుకను ఆస్వాదిస్తూ కనిపించగా, పేసర్ దీపక్ చాహర్ తన భార్యతో కలిసి పాల్గొన్నాడు.

ముంబై ఇండియన్స్ ముందంజ‌: ఇర్ఫాన్ ప‌ఠాన్

ఇంకో వైరల్ వీడియోలో రోహిత్ కుటుంబంతో సన్నిహితంగా ఉండే బ్యాటర్ తిలక్ వర్మ సమైరాను తన చేతుల్లో ఎత్తుకుని ఉండగా, రోహిత్ శర్మ డ్యాన్స్ కొనసాగిస్తున్న దృశ్యాలు కనిపించాయి. ఈ వైరల్ క్షణాలు ఐపీఎల్ సీజన్‌కు ముందు ముంబై ఇండియన్స్ జట్టులో ఉన్న బలమైన టీమ్ బాండింగ్‌ను ప్రతిబింబించాయి. ఇదిలా ఉండగా, ఐపీఎల్‌లో అత్యుత్తమ ఫ్రాంచైజీపై జరుగుతున్న చర్చపై మాజీ భారత ఆల్‌రౌండర్ ఇర్ఫాన్ పఠాన్ స్పందించారు. ప‌ఠాన్‌ మాట్లాడుతూ, భారత క్రికెట్‌కు ప్రతిభావంతమైన యువ ఆటగాళ్లను అందించడంలో ముంబై ఇండియన్స్ ముందంజలో ఉందని పేర్కొంటూ, చెన్నై సూపర్ కింగ్స్ కంటే ముంబై ఇండియన్స్‌కు కొంత ఆధిక్యం ఉందని అభిప్రాయపడ్డారు. ముంబై ఇండియన్స్, చెన్నై సూపర్ కింగ్స్ రెండూ ఐదేసి ఐపీఎల్ టైటిళ్లు గెలుచుకున్నాయి. వరుసగా రోహిత్ శర్మ, ఎంఎస్ ధోనీ నాయకత్వంలో ఈ విజయాలు సాధించడంతో ఈ రెండు జట్ల మధ్య పోలిక చేయడం కష్టం అని భావిస్తున్న‌ట్లు తెలిపారు.

ఎవ‌రు అత్యుత్త‌మ ప్లేయ‌ర్లు..

సీఎస్‌కే, ఎంఐ మధ్య అత్యుత్తమ జట్టు ఎవరనే ప్రశ్న ఎప్పుడూ చర్చనీయాంశంగానే ఉంటుంది. సీఎస్‌కే 2010లో టైటిళ్లు గెలవడం ప్రారంభించి, 2010, 2011ల‌లో వరుసగా ఛాంపియన్‌గా నిలిచిన తొలి జట్టైంది. అయితే ముంబై ఇండియన్స్ 2013లో గెలవడం ప్రారంభించిన తర్వాత దాదాపు ప్రతి ప్రత్యామ్నాయ సంవత్సరంలో టైటిళ్లు గెలుచుకుంటూ, 2019, 2020లో వరుసగా టైటిళ్లు సాధించింది. ముంబై ఇండియన్స్ గురించి నాకు నచ్చిన విషయం భారత క్రికెట్‌కు చేసిన సేవ, జాతీయ జట్టుకు వారు అందించిన మ్యాచ్ విన్నర్లు అసాధారణంగా ఉన్నారు.. అని ఇర్ఫాన్ పఠాన్ జియోస్టార్‌లో తెలిపారు.