Adipurush : కార్తికేయ 2 చిన్న సినిమాగా విడుదలై ఎవరూ ఊహించని అపూర్వ విజయాన్ని సొంతం చేసుకుంది. శ్రీ కృష్ణుడి గురించిన చరిత్రను తెలుపుతూ భక్తి భావంతో తీసిన ఈ చిత్రానికి హిందీ భాషలో కూడా ఉత్తరాది హిందూ ప్రేక్షకులు బ్రహ్మరథం పట్టారు. దీంతో కేవలం రూ.20 కోట్ల నుండి రూ.30 కోట్ల బడ్జెట్ తో రూపొందిన ఈ సినిమా రూ.100 కోట్ల వసూళ్ల మైలురాయిని దాటేసింది.
ఇక శ్రీ కృష్ణుడి గొప్పదనాన్ని చాటి చెప్పడం వలననే కార్తికేయ 2 చిత్రం ఘన విజయం సాధించిందని సోషల్ మీడియాలో ప్రచారం జరుగుతోంది. ఇదే తరహాలో భారత దేశంలో ఎక్కువగా పూజించబడే శ్రీ రాముడిపై ఆయన గొప్ప దనాన్ని, ఘన కీర్తిని చూపించే విధంగా రాబోయే ప్రభాస్ సినిమా ఆదిపురుష్ కూడా ఊహకందని విజయం సాధిస్తుందని, థియేటర్లు రామ మందిరాలుగా మారిపోతాయని సోషల్ మీడియాలో టాక్ నడుస్తోంది. ఇక ఈ సినిమాతో ప్రభాస్ కచ్చితంగా పెద్ద నేషనల్ స్టార్ అయిపోతాడని ఆయన అభిమానులు ఆశిస్తున్నారు. అంతేకాదు బాహుబలి సినిమా రికార్డులను కూడా కేవలం 2 వారాల్లోనే బ్రేక్ చేయబోతుందని ఊహాగానాలు చక్కర్లు కొడుతున్నాయి.
అయితే ఈ చిత్రంలో రావణుడి పాత్రలో బాలీవుడ్ నటుడు సైఫ్ అలీ ఖాన్ నటించనున్న సంగతి ఇదివరకు తెలిసిందే. ఆయన చాలా గొప్ప నటుడు అయినప్పటికీ ఇప్పుడు సోషల్ మీడియాలో ఈయనతోపాటు ఇంకొందరు నటులపై వ్యతిరేక ప్రచారం జరుగుతున్నందు వలన దీని ప్రభావం ఆదిపురుష్ చిత్రంపై పడుతుందేమోనని కొందరు అభిప్రాయ పడుతున్నారు. ఒకవేళ అలా గానీ జరిగితే ఈ సినిమా కూడా ఇప్పుడు ట్రెండ్ అవుతున్న బాయ్ కాట్ ముప్పును ఎదుర్కొన వలసి వస్తుందని వారు అంచనా వేస్తున్నారు. ఏదేమైనా ఈ సినిమా ఫలితాన్ని భవిష్యత్తు మాత్రమే నిర్ణయిస్తుంది. కనుక ఏం జరుగుతుందో తెలియాలంటే.. సినిమా విడుదల అయ్యే వరకు వేచి చూడక తప్పదు.
