విజయ్ పార్టీ ఎఫెక్ట్: చెపాక్ స్టేడియంలో ఈలలపై నిషేధం.. పొలిటికల్ సెగ!

చెన్నైలోని ఎం.ఏ.చిదంబరం స్టేడియం(చెపాక్)లో విజిల్‌లపై నిషేధం అమలులోకి వచ్చింది. టీ20 వరల్డ్ కప్ 2026 మ్యాచ్‌లతో ఈ నిర్ణయం అమలవుతోంది. తమిళనాడు క్రికెట్ అసోసియేషన్ (TNCA) ఈ నిర్ణ‌యం తీసుకుంది. ప్రేక్షకులు స్టేడియంలోకి విజిల్‌లు తీసుకురావడాన్ని పూర్తిగా నిషేధించారు. శబ్దం చేసే పరికరాలన్నింటినీ నిషిద్ధ వస్తువుల జాబితాలో చేర్చారు. ఫిబ్రవరి 8న జరిగిన న్యూజిలాండ్-ఆఫ్గ‌నిస్థాన్ వరల్డ్ కప్ మ్యాచ్‌తో ఈ నిబంధనను మొదటిసారి అమలు చేశారు. ఎంట్రీ గేట్ల వద్ద కఠిన తనిఖీలు నిర్వహించారు. స్టేడియం వెలుపల విజిల్‌లు అమ్మ‌వ‌ద్ద‌ని విక్రేత‌ల‌కు కూడా సూచనలు ఇచ్చారు. మొదట్లో ఈ నిబంధనను స్థానిక పోలీసులు విధించారని వార్తలు వచ్చాయి. కానీ తరువాత స్టేడియం యాజమాన్యం ఇది ఇంటర్నేషనల్ క్రికెట్ కౌన్సిల్ (ICC) మార్గదర్శకాల ప్రకారం తీసుకున్న నిర్ణయమని స్పష్టం చేసింది. శబ్దం వల్ల ఆటకు అంతరాయం కలిగించే వస్తువులపై ఇది సాధారణ నిబంధన అని పేర్కొన్నారు. తాజాగా TNCA అధికారికంగా ప్రకటించడంతో చెపాక్‌కు ఇది శాశ్వత నిబంధనగా మారింది.

విజిల్‌కు ప్ర‌త్యేక స్థానం..

చెన్నైలో విజిల్‌కు ప్రత్యేక స్థానం ఉంది. ముఖ్యంగా చెన్నై సూపర్ కింగ్స్ (CSK)తో విజిల్ పోడు నినాదం అభిమానులలో విస్తృతంగా ప్రాచుర్యం పొందింది. మ్యాచ్‌ల సమయంలో విజిల్‌లు ఊదడం చెపాక్ సంస్కృతిలో భాగంగా మారింది. అయితే ఇటీవల తమిళగ వెట్రి కజగం (TVK)కు ఎన్నికల గుర్తుగా విజిల్ ను కేటాయించడంతో ఈ సాధారణ వస్తువు రాజకీయ రంగు పులుముకుంది. టీవీకేకు నాయకత్వం వహిస్తున్న విజయ్ రాజకీయ ప్రవేశంతో ఈ అంశం మరింత సున్నితంగా మారింది. ఈ నేపథ్యంలోనే నిషేధం రావడంతో టైమింగ్‌పై అనుమానాలు వ్యక్తమవుతున్నాయి. ఈ విషయంపై CSK సీఈవో కాశీ విశ్వనాథన్ స్పందించేందుకు నిరాకరించారు.

ఐపీఎల్ సీజ‌న్‌లో ఎలా..?

విజిల్ నిషేధంపై CSK అభిమానులు, టీవీకే నేతలు అసంతృప్తి వ్యక్తం చేస్తున్నారు. పాలక డీఎంకేపై ఆరోపణలు కూడా వినిపిస్తున్నాయి. అయితే TNCA, పోలీసులు ఇది సాధారణ భద్రతా చర్య మాత్రమేనని స్పష్టం చేస్తున్నారు. వరల్డ్ కప్ వేదికలన్నింటిలో ఇలాంటి నిబంధనలు అమలులో ఉంటాయని చెబుతున్నారు. అయితే త్వ‌ర‌లో మొద‌లు కానున్న ఐపీఎల్ సీజ‌న్ గురించే ఇప్పుడు చ‌ర్చంతా న‌డుస్తోంది. ఏప్రిల్‌లో ప్రారంభమయ్యే ఐపీఎల్, తమిళనాడు అసెంబ్లీ ఎన్నికల ప్రచార కాలంతో కలిసివస్తోంది. చెపాక్‌లో జరిగే CSK హోం మ్యాచ్‌లలో కూడా ఈ నిషేధం కొనసాగుతుందా అనే దానిపై స్పష్టత లేదు. నిషేధం కొనసాగితే స్టేడియం రాజకీయ వేదికగా మారకుండా అడ్డుకునే చర్యగా భావించే అవకాశం ఉంది. అదే సమయంలో మరో వివాదానికి ఇది దారితీయవచ్చన్న అభిప్రాయాలు కూడా వ్యక్తమవుతున్నాయి. అయితే ఐపీఎల్‌లో ఏమ‌వుతుందో వేచి చూస్తే తెలుస్తుంది.