హై బీపీ ఉన్నవారు రోజుకు ఎంత ఉప్పు తినాలి? గుండెను కాపాడుకోవాలంటే ఈ రూల్స్ తప్పనిసరి!

హై బ్లడ్ ప్రెజర్ (Hypertension) సమస్యను నియంత్రించడంలో ఉప్పు వినియోగం కీలక పాత్ర పోషిస్తుంది. ప్రపంచవ్యాప్తంగా ఆరోగ్య సంస్థలు, శాస్త్రీయ అధ్యయనాలు ఉప్పు తగ్గించడంపై ఒకే మాట చెబుతున్నాయి. రోజూ ఎంత ఉప్పు సురక్షితం? అధిక సోడియం ఎలా తగ్గించాలి? ఇవన్నీ తెలుసుకుంటే రక్తపోటును నియంత్రించుకోవడం సులభమవుతుంది. ఉప్పులో ఉండే సోడియం శరీరంలో నీటిని నిల్వ చేయిస్తుంది. సోడియం ఎక్కువైతే నీటి పరిమాణం పెరిగి రక్తప్రవాహం అధికమవుతుంది. దీని వల్ల రక్తనాళాలపై ఒత్తిడి పెరిగి బీపీ పెరుగుతుంది. దీర్ఘకాలంలో ఇది గుండె, కిడ్నీలు, రక్తనాళాలకు నష్టం కలిగించే ప్రమాదం ఉంది.

రోజుకు ఎంత ఉప్పు తీసుకోవాలి?

హై బీపీ ఉన్నవారికి రోజుకు 1,500 మిల్లీగ్రాముల కంటే తక్కువ సోడియం (సుమారు ¾ టీ స్పూన్ ఉప్పు) తీసుకోవాలని WHO, AHA సూచిస్తున్నాయి. సాధారణ ప్రజలకు గరిష్టంగా 2,300 మిల్లీగ్రాములు (సుమారు ఒక టీ స్పూన్) వరకు మాత్రమే సురక్షితం.
రోజుకు సోడియం వినియోగాన్ని 1,000 మిల్లీగ్రాములు తగ్గిస్తే సిస్టాలిక్ బీపీ 3-5 mm Hg వరకు తగ్గుతుందని అధ్యయనాలు చెబుతున్నాయి. చాలామందికి ఆశ్చర్యం కలిగించే విషయం ఏంటంటే ఎక్కువ ఉప్పు, ఉప్పు డబ్బా నుంచి కాదు ప‌లు ఆహారాల నుంచి వ‌స్తుంది. ప్రాసెస్ చేసిన ఆహారం, రెడీ టు ఈట్ ఫుడ్స్, బ్రెడ్, చీజ్, సాస్‌లు, క్యాన్డ్ ఫుడ్స్, ఫాస్ట్ ఫుడ్ వంటి వాటిలో ఉప్పు దాగి ఉంటుంది. అందుకే ఫుడ్ లేబుల్స్ చదవడం చాలా ముఖ్యం.

ఉప్పు తగ్గించడానికి చేయాల్సినవి..

తాజా కూరగాయలు, పండ్లు, సంపూర్ణ ధాన్యాలు ఎక్కువగా తీసుకోవాలి. ఇంట్లో వంట చేయడం అలవాటు చేసుకోవాలి. ఉప్పుకు బదులుగా నిమ్మరసం, వెల్లుల్లి, మసాలాలు, ఆకుకూరలు వాడాలి. ఒక్క సర్వింగ్‌లో 140 mg కన్నా తక్కువ సోడియం ఉన్న ఆహారాన్ని ఎంచుకోవాలి. ప్రాసెస్ చేసిన మాంసాహారం, సాల్టెడ్ స్నాక్స్ తగ్గించాలి. ఉప్పు ప్రత్యామ్నాయాలు వాడేముందు డాక్టర్ సలహా తప్పనిసరి. అయితే చాలా తక్కువ ఉప్పు కూడా ప్రమాదమే! అని వైద్యులు చెబుతున్నారు. సోడియం శరీరంలో నరాలు, కండరాల పనితీరుకు అవసరం. రోజుకు 500-1500 mg కన్నా తక్కువ సోడియం తీసుకుంటే (ప్రత్యేకించి గుండె, కిడ్నీ సమస్యలున్నవారు) వైద్యుల పర్యవేక్షణ అవసరం. మితమే మంత్రం.

రోజుకు 1500-2000 mg సోడియం పరిమితిలో ఉంచితే హై బీపీని సమర్థవంతంగా నియంత్రించవచ్చు. ప్రాసెస్ చేసిన ఆహారం తగ్గించడం, అదనపు ఉప్పు నివారించడం, ఆరోగ్యకర జీవనశైలి పాటిస్తే గుండెజబ్బులు, స్ట్రోక్ ప్రమాదాన్ని గణనీయంగా తగ్గించుకోవచ్చు.

ముఖ్య గమనిక (Note/Disclaimer): ఈ సమాచారం కేవలం అవగాహన కోసం మాత్రమే. అధిక రక్తపోటు తీవ్రతను బట్టి ఉప్పు మోతాదు మారుతుంది, కాబట్టి మీ వ్యక్తిగత ఆరోగ్య పరిస్థితికి అనుగుణంగా డాక్టర్‌ను లేదా డైటీషియన్‌ను సంప్రదించి నిర్ణయం తీసుకోవాలి.