వీరు బొప్పాయి పండ్లు తినకూడదు.. నిపుణుల హెచ్చరిక!

విటమిన్లు A, C, Eతో పాటు శక్తివంతమైన యాంటీ ఆక్సిడెంట్లు, జీర్ణక్రియకు సహాయపడే ప‌పైన్ ఎంజైమ్‌తో బొప్పాయి ఎన్నో ఏళ్లుగా సూపర్ ఫ్రూట్ గా గుర్తింపు పొందింది. జీర్ణక్రియను మెరుగుపరచడం, రోగనిరోధక శక్తిని పెంచడం, చర్మానికి కాంతినివ్వడం వంటి ప్రయోజనాలతో ప్రపంచవ్యాప్తంగా ఆరోగ్యాన్ని పట్టించుకునే వారి ఆహారంలో ఇది చోటు దక్కించుకుంది. అయితే, ఈ ఉష్ణమండల ఫలం అందరికీ సురక్షితమేనా? అన్న ప్రశ్నకు సమాధానం – కాదు అనే చెప్ప‌వ‌చ్చు. ముఖ్యంగా ఎక్కువ మోతాదులో తినడం లేదా పచ్చి బొప్పాయిని తీసుకోవడం కొన్ని వర్గాల వారికి ప్రమాదకరంగా మారవచ్చని పరిశోధనలు హెచ్చరిస్తున్నాయి. నేష‌న‌ల్ ఇనిస్టిట్యూట్స్ ఆఫ్ హెల్త్ (NIH), సైన్స్ డైరెక్ట్‌, నేష‌న‌ల్ కిడ్నీ ఫౌండేష‌న్ నివేదికల ఆధారంగా బొప్పాయిని నిత్యం తీసుకునే ముందు ఈ ఐదు వర్గాల ప్ర‌జ‌లు ఆలోచించాల్సిన అవసరం ఉందని నిపుణులు సూచిస్తున్నారు.

గర్భిణీ మహిళలు..

గర్భవతులు పచ్చి లేదా పూర్తిగా పండ‌ని బొప్పాయిని పూర్తిగా దూరంగా ఉంచాలని వైద్యులు సూచిస్తున్నారు. ఇందులో ఉండే లాటెక్స్, అధిక మోతాదులోని ప‌పైన్ గర్భాశయ సంకోచాలను ప్రేరేపించే అవకాశముందని అధ్యయనాలు చెబుతున్నాయి. దీని వల్ల ముందస్తు ప్రసవం లేదా ఇతర సమస్యలు తలెత్తే ప్రమాదం ఉంది. పూర్తిగా పండిన బొప్పాయి కొద్ది మోతాదులో పెద్దగా సమస్య కాదన్న అభిప్రాయం ఉన్నప్పటికీ, భద్రత కోసమే గర్భధారణ సమయంలో బొప్పాయిని పూర్తిగా నివారించడమే మంచిదని నిపుణులు అంటున్నారు.

గుండె లయ సమస్యలు ఉన్నవారు..

బొప్పాయిలో సహజంగా సయనోజెనిక్ సమ్మేళనాలు ఉంటాయి. ఇవి శరీరంలో మార్పులకు లోనైనప్పుడు తక్కువ మోతాదులో హైడ్రోజన్ సయనైడ్ విడుదలయ్యే అవకాశం ఉంటుంది. సాధారణంగా ఇది హానికరం కాకపోయినా, గుండె లయ అసమానతలు (అరిత్మియా) లేదా ఇతర గుండె సంబంధిత సమస్యలు ఉన్నవారికి ఇది ఇబ్బందికరంగా మారవచ్చు. అధికంగా బొప్పాయిని తీసుకోవడం మందుల ప్రభావాన్ని కూడా తగ్గించవచ్చని హెచ్చరికలు ఉన్నాయి. కాబట్టి గుండె వ్యాధులు ఉన్నవారు వైద్యుల సలహా లేకుండా బొప్పాయిని ఆహారంలో చేర్చకపోవడమే ఉత్తమం.

లాటెక్స్ అలెర్జీ ఉన్నవారు..

చాలామందికి తెలియని విషయం ఏంటంటే బొప్పాయిలోని కొన్ని ప్రోటీన్లు సహజ లాటెక్స్‌లో ఉండే ప్రోటీన్లతో పోలిక కలిగి ఉంటాయి. సైన్స్‌డైరెక్ట్ ప్రకారం, లాటెక్స్ అలెర్జీ ఉన్నవారిలో బొప్పాయి తీసుకుంటే దురద, తుమ్ములు, చర్మ సమస్యల నుంచి అరుదుగా శ్వాస సంబంధిత తీవ్ర సమస్యల వరకూ కనిపించే అవకాశం ఉంది. కాబట్టి లాటెక్స్ అలెర్జీ ఉన్నవారు బొప్పాయిని పూర్తిగా దూరంగా ఉంచడం మంచిది.

హైపోథైరాయిడిజం ఉన్నవారు..

థైరాయిడ్ సమస్యలతో బాధపడేవారు కూడా బొప్పాయి విషయంలో జాగ్రత్తగా ఉండాలి. బొప్పాయిలోని కొన్ని పదార్థాలు థైరాయిడ్ హార్మోన్ పనితీరును అడ్డుకునే అవకాశం ఉందని పరిశోధనలు సూచిస్తున్నాయి. దీని వల్ల అలసట, నెమ్మదైన మెటబాలిజం, చలిని తట్టుకోలేకపోవడం వంటి లక్షణాలు మరింత తీవ్రం కావచ్చు. వైద్యుల సూచన లేకుండా బొప్పాయిని నిత్యాహారంగా తీసుకోవడం థైరాయిడ్ నియంత్రణను సంక్లిష్టం చేయవచ్చని నిపుణులు చెబుతున్నారు.

కిడ్నీ రాళ్లకు లోనయ్యే వారు..

విటమిన్ C అధికంగా ఉండటం బొప్పాయికి ప్లస్ పాయింట్. కానీ కిడ్నీ రాళ్ల సమస్య ఉన్నవారికి ఇదే మైనస్ కావచ్చు. అధిక విటమిన్ C శరీరంలో ఆక్సలేట్లుగా మారి, కాల్షియంతో కలిసి కిడ్నీ రాళ్లుగా మారే అవకాశం ఉంటుంది. నేషనల్ కిడ్నీ ఫౌండేషన్ ఇప్పటికే కిడ్నీ రాళ్ల చరిత్ర ఉన్నవారు విటమిన్ C తీసుకునే విషయంలో నియంత్రణ పాటించాలని సూచిస్తోంది. కాబట్టి అలాంటి వారు బొప్పాయిని పరిమితంగా తీసుకోవడం అవసరం.

బొప్పాయి పోషక విలువల పరంగా ఎంతో మేలు చేసే ఫలమే. కానీ అందరికీ ఒకే విధంగా సరిపోదు. గర్భిణీలు, గుండె లయ సమస్యలు ఉన్నవారు, లాటెక్స్ అలెర్జీ ఉన్నవారు, థైరాయిడ్ సమస్యలు లేదా కిడ్నీ రాళ్ల చరిత్ర ఉన్నవారు ప్రత్యేకంగా జాగ్రత్త వహించాలి. సరైన మోతాదు, సరైన సందర్భంలో తీసుకుంటేనే బొప్పాయి నిజమైన సూపర్‌ఫ్రూట్ గా ప‌నిచేస్తుంది.

గ‌మ‌నిక: ఈ క‌థ‌నంలో ఇచ్చిన స‌మాచారం కేవ‌లం వైద్య విజ్ఞానం, అవ‌గాహ‌న కోసం మాత్ర‌మే. చికిత్స‌కు ప్ర‌త్యామ్నాయం కాదు. ఎవ‌రికైనా స‌రే ఏదైనా స‌మ‌స్య ఉన్నా లేదా స‌ల‌హా కావాల‌న్నా వైద్యుల‌ను సంప్ర‌దించాల్సి ఉంటుంది.