మెగాస్టార్‌పై అనుచిత వ్యాఖ్యలు.. ట్రోలర్‌కు లావణ్య త్రిపాఠి స్ట్రాంగ్ కౌంటర్!

మెగాస్టార్ చిరంజీవిపై ఓ నెటిజ‌న్‌ చేసిన అనుచిత వ్యాఖ్యలపై నటి లావణ్య త్రిపాఠి తీవ్రంగా స్పందించారు. తన భర్త వరుణ్ తేజ్ పెద‌నాన్న చిరంజీవి కావ‌డంతో ఆయ‌న‌పై ఓ వ్య‌క్తి వేసిన జోక్‌ను ఆమె ఖండించారు. ముఖ్యంగా మనవడి విషయంలో చిరంజీవికి ప్రత్యేక అభిరుచి ఉందంటూ చేసిన వ్యాఖ్యలను లావణ్య తీవ్రంగా తప్పుబట్టారు. సోషల్ మీడియా వేదికగా స్పందించిన లావణ్య.. సాధారణంగా ఇలాంటి ట్వీట్లను పట్టించుకోను. కానీ ఇది మీ నుంచి రావడం ఆశ్చర్యం కలిగించింది. ఎంతో ఆనందంగా ఉన్న కుటుంబ సందర్భాన్ని అతి నీచంగా మలిచారు. ఆయన తన కుటుంబంలోని మహిళలను, ముఖ్యంగా మనవరాళ్లను ఎంత గౌరవంగా చూసుకుంటారో మీకు తెలియదు. ఆయన చేసే పనుల్లో కనీసం ఒక శాతం కూడా చాలా మంది పురుషులు చేయలేరు. నిజంగా తెలియని వారి గురించి వ్యాఖ్యానించకపోవడమే మంచిది.. అంటూ ఘాటు కౌంటర్ ఇచ్చారు.

లావ‌ణ్య కామెంట్ల‌పై మిశ్ర‌మ స్పంద‌న‌..

ఈ ట్వీట్ వైరల్ కావడంతో, లావణ్యకు మద్దతుగా పలువురు స్పందించగా, ఆమె మాటల తీరు సరైంది కాదంటూ కొందరు విమర్శించారు. ఇతరులను తక్కువ చేసి మీ కుటుంబాన్ని గొప్పగా చూపించాల్సిన అవసరం లేదు. ఇది 2026, ప్రజాస్వామ్యంలో ఉన్నాం.. అంటూ కొందరు నెటిజన్లు కామెంట్లు చేశారు. కాగా ఫిబ్రవరి 2025లో ఓ కార్యక్రమంలో చిరంజీవి చేసిన వ్యాఖ్యలు అప్పట్లో పెద్ద చర్చకు దారితీశాయి. తన ఇంట్లో నలుగురు మనవరాళ్లు ఉండటంతో లేడీస్ హాస్టల్ వార్డెన్‌లా ఉన్నాను అంటూ సరదాగా వ్యాఖ్యానించిన చిరంజీవి, తన కుమారుడు రామ్ చరణ్ నుంచి మనవడు పుడితే కుటుంబ వారసత్వం కొనసాగుతుందని ఆశిస్తున్నానన్నారు. ఇంకోసారి అమ్మాయి పుడితే ఏమవుతుందోనని భయంగా ఉంది.. అన్న వ్యాఖ్యలు తీవ్ర విమర్శలకు గురయ్యాయి.

విమ‌ర్శ‌ల‌కు దారి తీస్తున్న చిరు వ్యాఖ్య‌లు..

రామ్ చరణ్ – ఉపాసన దంపతులకు 2023లో కుమార్తె క్లిన్ కారా జన్మించగా, ఆమెతో పాటు చిరంజీవికి సుష్మిత కొణిదెల కుమార్తె సమరా, శ్రీజ కొణిదెల కుమార్తెలు నివ్రతి, నవిష్కా మనవరాళ్లుగా ఉన్నారు. కాగా లావణ్య త్రిపాఠి – వరుణ్ తేజ్ దంపతులకు గత ఏడాది కుమారుడు జన్మించగా, ఆ సందర్భంగా చిరంజీవి హృదయపూర్వక శుభాకాంక్షలు తెలిపారు. కొణిదెల కుటుంబంలో పుట్టిన చిన్నారికి హృదయపూర్వక స్వాగతం. వరుణ్, లావణ్యకు అభినందనలు. బిడ్డకు ఆరోగ్యం, ఆనందం ఎల్లప్పుడూ ఉండాలని కోరుకుంటున్నాను.. అంటూ సోషల్ మీడియాలో పోస్ట్ చేశారు.

అయితే చిరంజీవి అప్పుడ‌ప్పుడు చేస్తున్న వ్యాఖ్య‌లు విమ‌ర్శ‌ల‌కు దారి తీస్తున్నాయి. ఈమ‌ధ్యే సినిమా ఇండ‌స్ట్రీలో క్యాస్టింగ్ కౌచ్ లేదని అన్నారు. కానీ ఆ వ్యాఖ్య‌ల‌కు సింగ‌ర్ చిన్మ‌యి స‌హా ప‌లువురు కౌంట‌ర్ ఇచ్చారు. ఈ నేప‌థ్యంలో ఆయ‌న గ‌తంలో చేసిన ఆ లింగ వివ‌క్ష వ్యాఖ్య‌లు ఇప్పుడు మ‌ళ్లీ వైర‌ల్ అవుతున్నాయి. అయితే లావ‌ణ్య త్రిపాఠి అలా స్పందించం క‌రెక్టేనా..? మీ అభిప్రాయాన్ని కామెంట్ల రూపంలో తెలియ‌జేయండి.