T20 World Cup 2021 : షార్జాలో జరిగిన ఐసీసీ టీ20 వరల్డ్ కప్ 2021 టోర్నీ 39వ మ్యాచ్లో ఇంగ్లండ్పై సౌతాఫ్రికా గెలుపొందింది. సౌతాఫ్రికా నిర్దేశించిన లక్ష్యాన్ని ఛేదించే క్రమంలో ఇంగ్లండ్ కొన్ని పరుగుల దూరంలో ఆగిపోయింది. చివరి వరకు కష్టపడినా ఇంగ్లండ్కు గెలుపు దక్కలేదు. ఈ క్రమంలో ఇంగ్లండ్పై సౌతాఫ్రికా 10 పరుగుల తేడాతో విజయం సాధించింది.
మ్యాచ్ లో టాస్ గెలిచిన ఇంగ్లండ్ ముందుగా ఫీల్డింగ్ ఎంచుకోగా.. సౌతాఫ్రికా బ్యాటింగ్ చేసింది. ఈ క్రమంలో సౌతాఫ్రికా నిర్ణీత 20 ఓవర్లలో 2 వికెట్ల నష్టానికి 189 పరుగుల స్కోరు చేసింది. సౌతాఫ్రికా బ్యాట్స్మెన్లలో రాసీ వన్ డర్ డుస్సెన్ 60 బంతుల్లోనే 5 ఫోర్లు, 6 సిక్సర్లతో 94 పరుగులు చేసి నాటౌట్గా నిలిచాడు. ఎయిడెన్ మార్కరమ్ 25 బంతుల్లో 2 ఫోర్లు, 4 సిక్సర్లతో 52 పరుగులు చేయగా, క్వింటన్ డికాక్ 27 బంతుల్లో 4 ఫోర్లతో 34 పరుగులు చేశాడు. ఇంగ్లండ్ బౌలర్లలో మొయిన్ అలీ, ఆదిల్ రషీద్లకు చెరొక వికెట్ దక్కింది.
అనంతరం బ్యాటింగ్ చేసిన ఇంగ్లండ్ 20 ఓవర్లలో 8 వికెట్లను కోల్పోయి 179 పరుగులు చేసింది. ఆ జట్టు బ్యాట్స్మెన్లలో మొయిన్ అలీ 27 బంతుల్లో 3 ఫోర్లు, 2 సిక్సర్లతో 37 పరుగులు చేయగా, డేవిడ్ మలన్ 26 బంతుల్లో 3 ఫోర్లు, 1 సిక్సర్తో 33 పరుగులు చేశాడు. అలాగే లియామ్ లివింగ్ స్టోన్ 17 బంతుల్లో 1 ఫోర్, 3 సిక్సర్లతో 28 పరుగులు చేశాడు. సౌతాఫ్రికా బౌలర్లలో రబాడా 3 వికెట్లు పడగొట్టాడు. తబ్రెయిజ్ శంషీ, డ్వానె ప్రిటోరియస్లకు 2 వికెట్ల చొప్పున దక్కాయి. ఆన్రిచ్ నోర్జె 1 వికెట్ తీశాడు.
స్పందించండి